Morgunfundur um skipulag landbúnaðarlands – samfélag, landslag og loftslag
Skipulagsstofnun stendur, í samvinnu við Samband íslenskra sveitarfélaga, fyrir morgunfundi um skipulag landbúnaðarlands fimmtudaginn 28. nóvember kl. 8.30-10.00.
Fundurinn verður haldinn í húsakynnum Skipulagsstofnunar í Borgartúni 7 (kjallara, gengið inn um port á austurhlið) og verður honum streymt á Facebook-síðu Skipulagsstofnunar. Húsið opnar kl. 8:00 og hefst dagskrá kl. 8:30. Óskað er eftir skráningum á fundinn hér (ekki er þörf á að skrá sig til að fylgjast með streymi). Dagskrá fundarins er að finna hér að neðan.
Skipulag í dreifbýli
Nýting lands í dreifbýli er meðal þess sem sveitarstjórnir móta stefnu um við skipulagsgerð, svo sem hvaða landi er ráðstafað til landbúnaðarnota. Í gildandi landsskipulagsstefnu er sett fram markmið um fjölbreytta og hagkvæma nýtingu landbúnaðarlands í sátt við umhverfið og lögð áhersla á að landi sem hentar vel til ræktunar verði almennt ekki ráðstafað til annarra nota með óafturkræfum hætti. Í landsskipulagsstefnu er jafnframt sett fram markmið um að vexti sé beint að þeim kjörnum sem fyrir eru og að í dreifbýli tengist fjölgun íbúða fremur búrekstri eða annarri staðbundinni landnýtingu eða atvinnustarfsemi. En hvað er gott ræktarland og að hverju þarf að huga í tengslum við þróun byggðar og skipulag í dreifbýli? Á fundinum verður fjallað um þessi mál, þar á meðal um flokkun landbúnaðarlands, þróun byggðar í dreifbýli og vernd og endurheimt votlendis með tilliti til áhrifa á samfélag, landslag og loftslag.
Morgunfundaröð um landsskipulagsstefnu
Fundurinn tilheyrir morgunfundaröð Skipulagsstofnunar um landsskipulagsstefnu. Stofnunin vinnur nú að tillögu til umhverfis- og auðlindaráðherra að viðauka við gildandi landsskipulagsstefnu þar sem lögð er áhersla á þrjú viðfangsefni, loftslag, landslag og lýðheilsu. Á næstu mánuðum verða kynnt margvísleg verkefni sem unnið er að í tengslum við mótun landsskipulagsstefnu, meðal annars um loftslagsaðgerðir í þéttbýli, lýðheilsuáherslur við skipulagsgerð, kortlagningu víðerna og flokkun landslagsgerða. Áhugasamir eru hvattir til að fylgjast með á www.landsskipulag.is.
Dagskrá
8:00
Húsið opnar - heitt á könnunni
8:30-10:00
Skipulag í dreifbýli Glærur
Ásdís Hlökk Theodórsdóttir, forstjóri Skipulagsstofnunar
Flokkun og skipulag landbúnaðarlands Glærur
Salvör Jónsdóttir, skipulagsfræðingur
Forsendur fyrir flokkun landbúnaðarlands Glærur
Jón Guðmundsson, lektor við Landbúnaðarháskóla Íslands
Kolefnisspor landnotkunar Glærur
Stefán Gíslason, framkvæmdastjóri Environice
Umræður